美國雜誌《名利場》（VanityFair）選資訊時代百大有權勢人物，第一名係高盛行政總裁LloydBlankfein，第二名係蘋果公司行政總裁喬布斯，第三十一位竟然係中國投資有限公司總經理高西慶，我地香港人一睇就知道美國人不認識中國啦。高西慶唔係唔叻，做過中證監主席，但佢上面仲有位董事長樓繼偉噃，高西慶排到第三十一位，咁樓繼偉要排第幾名？何況中國最有權勢之人物永遠係中央政治局委員，高西慶隨時可以畀上頭炒魷魚，講乜嘢權勢呀，美國人以為國營投資公司總經理就係有權勢，可笑也。
笑完之後，扭開now電視，啱啱睇到一段錄影，就係中國有一個調查，問一啲小學生大個後想做乜，一位女孩子聲言（畫面有格仔封眼）話：「我想做官。」問：「做怎麼樣的官？」答：「貪官！」嘩，嚇親，唔怪得中國專家馬鐵穎要詳細點評。小女孩有此願望，着實令人憂心。幾日前出版界靚女P送來新書，鍾祖康寫嘅《中國你憑甚麼？》揭了幾頁，還未閱讀，已知鍾祖康呢位移民挪威嘅香港仔對中國有好強烈嘅不滿，對中國民情、國情，充滿反感。相信佢如果睇到小孩子話：「想做貪官」呢個畫面，必然加多一章痛數中國教育。
在中國做貪官有乜好？有錢囉，有女人囉（內地男性貪官必有多名情婦），可以送孩子去美國、英國留學囉，一言以蔽之，小孩子有滿腦子發財思想，知道今天中國社會笑貧不笑娼，笑貧不笑貪，最緊要講錢、錢、錢。記者T訪問過一位極資深基金經理L，基金L為人老實（係呀，基金經理都有好老實嘅人o架！）出於富裕家庭，曾在上海數年開拓生意。佢對記者T講：「我地呢類人永遠打唔入中國權力圈子，只能同啲大人物食飯食飯又食飯，講盡表面言語，如果你唔係佢地嘅同學、同門，點交往都係關係淡如水！」呢呢，基金L如果係台灣人就易辦啲嘞，基金L有香港嘅基本價值觀，不貪不亂玩，不送紅包，貪官最唔鍾意，點在內地拉關係吖。台灣生意人就唔同，入到內地，生活習慣相同，飲酒唱K飲花酒，如魚得水，送紅包更係熟手，在上海與在台北冇分別。