財爺鬍鬚曾早前話特區走出海嘯危機，猶如喺隧道見到曙光，結果俾人狂插鬧佢太過老定。外訪期間嘅鬍鬚曾似乎不甘受辱，噚日越洋喺網誌解畫，列舉幾個情景，解釋自己點解覺得特區已經走出海嘯陰霾。佢話，呢排搭公共交通工具時好似逼咗，商場人流同街上旅客亦多咗，最近同商界朋友見面時更加個個面口都好咗，同一年前憂心忡忡嘅神色相比，令人安心好多喎。
鬍鬚曾強調，特區政府喺金融海嘯一年內做咗好多嘢，喺來勢洶洶時候佢仲取消咗三次外訪㖭。雖然自覺海嘯對香港影響嘅最壞時間已經過去，但佢堅稱咁樣唔等於特區政府印印腳唔使做，日後會繼續實事求是搞好經濟。