轆Book：新S-Class超豪　一芒兩睇各自精采

轆Book：
新S-Class超豪　一芒兩睇各自精采

Benz旗艦級超豪華房車S-Class系列，今年紐約車展上終有新版登場，而實物亦剛熱辣到港。雖然新版外形無驚喜，但豪爆內容仍然係矚目之處，尤其係最新科技「一芒兩睇」，左右唔同角度望有唔同內容，互不干擾，有創意亦相當實用。

記者：徐影龍
攝影：楊錦文
Model：Alia@PureModels

小改款更安全

雖然官方發佈會稱為新世代S-Class，但車身線條其實唔算翻天覆地改頭換面，只屬Facelifted小改款，唔似新E-Class咁有驚喜。慶幸改動位都唔少，包括新設計鬼面罩、泵把線條同側鏡等，車身亦加入不少鍍銀飾邊。車尾變化最大，不但泵把整合尾喉成一體式設計，連尾燈都用上52顆LED，令整架S-Class充滿精緻及略帶Sporty嘅感覺。
除柴油同混能版本外，一如過往，到港新S系列嘅選擇依然豐富，由S300L到S65AMG級別都有，由最平109萬到350萬，真係任何級數嘅有錢佬都Cover到。而新E-Class多項新安全科技，理所當然喺S-Class身上都搵到，包括防止偏離車道嘅LaneKeepingAssist、防超速系統、防瞌眼瞓AttentionAssist等，多方向防護，包你揸同坐都咁安全舒適。

■同一個芒，左右望居然各有不同畫面，司機乘客互不打擾。

■（左邊望）只見到選曲、藍芽、調校冷氣等介面。

■（右邊望）另一邊卻只望到環迴音效介面，而且毫無鬼影。

創意多媒「睇」

由於未實試過新S-Class，改良咗嘅懸掛、操控等提升，未能親身體驗，不過對比外形同操控，屬旗艦級車系嘅S-Class最大賣點相信仍係新車可以有幾豪。車廂引入大量細微改良位同高科技豪華裝備，最叫人印象難忘，首推「一個芒兩份睇」（Splitview），唔係傳統嘅一開二左右分割式顯示，而係按司機位及前座乘客不同視野角度，睇到完全獨立嘅影像。如揸車嘅只望到GPS地圖，隔籬位就只望到Audio介面，揀歌轉台時完全唔會影響駕駛者。影像內容可自由揀選，如後泊鏡頭、環迴音效、冷氣調校等，左右方望到嘅內容任意調配，高科技得嚟亦相當實用。
音效方面，加入名廠harman/kardon嘅Logic7環迴系統，有靚聲定位之餘，亦加入SD卡槽及7.2GB硬碟，對應時下三大熱門數碼音樂格式，如MP3、ACC及WMA等，想玩激啲，仲有iPod線、USB頭、40GB大容量硬碟畀你揀，令多媒體享受更為豐富。