在四大天王中，張學友可謂是最誠實的一個，因為他最早婚，而且由英國結婚後返港即大方公告天下，不像劉德華和黎明般收收埋埋。學友前晚出席護苗活動，對於華仔被狠批一事，他力撐華仔，並指每個人都有自己選擇，不過，對於華仔想生兒育女，學友就覺得有點遲。
香港舞蹈團前晚在文化中心慈善首演《神鵰俠侶》，為護苗基金十周年籌款，出席嘉賓有護苗基金會長蕭芳芳、副主席施南生、護苗超級大使張學友，還有楊千嬅、林嘉欣、鍾欣桐和葉童等。
「冇得過招喎」
張學友一身金色外套和金色波鞋襯到絕赴會，近期劉德華和黎明分別被揭在美國賭城註冊結婚一事，鬧得熱烘烘，張學友則是四大天王中最早成家立室的，雖然他與太太羅美薇96年時在倫敦秘密註冊結婚，但返港後即公告天下，並不介意婚姻或會影響事業，現在更是兩女之父，反觀華仔和黎明對結婚秘而不宣，難怪學友獲封最誠實天王。
張學友談到華仔被狠批時說：「我都唔明，結婚應該係為佢哋高興先啱，每個人有自己嘅選擇，要尊重佢嘅決定。我同華仔同年，佢結婚我為佢高興，我個大女都9歲，但如果佢要生BB就好晏，但最緊要開心。」華仔在網誌中自爆因年紀漸長，生育需尋求醫學方法，問學友可會過兩招給華仔？他笑說：「點過呀，我真係好渣，唔知佢想生仔定女，又唔知佢想生幾多個，冇得過招喎，希望佢嘅fans同傳媒尊重佢。」
早前學友一家四口去日本度假，羅美薇被指因有潔癖，故只留在酒店房中，未有陪丈夫和女兒四出遊玩，學友說：「我知有記者跟住影相，我冇理到，嗰日我哋去樂園玩，因為太太唔鍾意去樂園，天氣又好曬，我咪同兩個女去囉。」他強調與潔癖無關。
千嬅跳起證冇孕
同場的楊千嬅一身束腰衫赴會，有指她發褔兼肚凸凸，千嬅即在記者面前跳起，笑言可以翻觔斗。有傳丁子高以99萬元禮金迎娶她，又指其愛巢是租住何超瓊的愛都大廈其中一單位，千嬅否認說：「冇咁嘅事，冇愛巢呀，但呢啲標題已經好好，有啲嘢唔使錢講嘅，我要分享嘅已分享晒。」至於她與劉德華合作的電影因檔期而要押後，但何時開工則未知。
蕭芳芳前晚戴着耳塞，她謂因為身處嘈雜地方會頭暈和作嘔。對於劉德華和黎明結了婚，芳芳似乎對黎明結婚較為驚訝，但就祝兩人要為婚姻而努力。
採訪：何慧詩 攝影：黃偉雄