金管局任總退休倒數，接受有線節目《周梁有請》訪問時自爆退休後有一大難題唔知點處理，並非唔知如何打發時間，而係為錢煩惱。
Cash揸手免利益衝突
任總管理萬億港元資產，為免利益衝突，在位時唔可以隨便投資股票，唯一投資出路係買樓，其餘身家放喺銀行，退休後冇咁多限制，要開始為此傷神。任總年薪逾千萬元，名下最少有四個港島豪宅，估值最少7,000萬元，如果佢真係冇揩金融產品，即係身家冇受金融海嘯打擊而大縮水，估計手持「茄薯」十分可觀，正式水浸眼眉。
外滙基金投資表現一直被詬病成績平平，任總日後要真金白銀用自己錢投資，唔知會唔會加多幾錢肉緊賺多啲？然而萬一勁賺，可能俾人話佢以前留力，蝕錢嘅話又肉痛，真係左右做人難，難怪佢話係「大難題」。
唔可以買股票，任總獨沽一味買磚頭，投資心得係喺香港買樓長線賺梗。當年佢用37億買國金高層做金管局總部，家賬面升值三倍，講起呢單傑作，佢情不自禁笑咗出嚟。股市蜑家雞見水，任總小賭怡情成績卻不俗，麻雀、鋤D、橋牌、賭馬樣樣贏多輸少，據講係「D王」㖭，不過佢話賭馬主要考眼光，冇可能長勝。
親口承認栽培陳德霖
坦言唔捨得退下來嘅任總話目前心情難以形容，但「官如流水，一個一個去」，總有個時候退休，佢又親口承認栽培陳德霖接班。退休後任總會同太太去旅行，之後因為家傭放假，佢笑言太太已安排佢做家務，所以應該唔會太清閒，至於未來動向，暫時冇安排咁話。
任總官威十足，佢話因為以前冇乜耐性聽人講嘢，容易擺出唔耐煩「乜你咁蠢o架」態度，近年「睇通咗」又成熟咗，已有改善，佢再次為以前擺款道歉。任總同煲呔以前係戰友，近年卻經常唱反調，任總否認兩人有衝突，自己只係提供宏觀分析。白髮bob頭係任總標誌，原來佢係Beatles擁躉，所以學偶像留呢個披頭髮型，1965年至今40幾年情不變，回望38年公職生涯，任總驪歌會唔會係《LetItBe》呢？
mailto:[email protected]