李國能辭職之日（九月二日），《信報》林行止發表一篇「舊事雖往矣，記錄當存真」，轟動中環。中環有好多林行止與曹仁超讀者，林文語氣婉轉，實則針針到肉，香江第一健筆示範如何寫文章，果然功力深厚，我地一生也學不來。財經W來電話：「似乎係割席聲明噃，係唔係曹Sir近來講嘢太多，喺《志雲飯局》飲咗幾杯呀？」左丁山冇睇過呢個節目，唔敢講。是否如此，難以深究；賓架P來電話：「林生要剝老曹光豬？」然後又到經濟E來電：「一日老闆，永遠老闆，做伙記嘅，要緊記呢一點，不可一日或忘。」又有經紀H來電：「林生有好多秘密爆晒出嚟噃。」所謂秘密也者，唔少傳媒人早已知之，不過經紀H未夠四十歲，視之為密料，覺得好驚奇啫。一個三十歲不到嘅記者，問左丁山香植球係邊一個，當然更唔識羅治平（《專業馬訊》創辦人，已逝）。
聽《信報》中人講，《信報》賣盤前後至今，曹仁超《投資者日記》已不是集體創作，而是曹志明一人主筆，曹志明獨擔大旗一段日子，加以新老闆上場後，佢嘅創作空間與出外發言之自由度大增，故已完全進入曹仁超角色，渾然忘我。不過經舊老闆一聲「獅子吼」之後，以後不如行不改名，就打正旗號，以「曹志明」寫《投資者日記》啦，或者連欄名都改埋，就叫做《曹志明講投資》，出埋照片壓陣（有啲報紙鍾意咁嘅噃），將「曹仁超」呢個筆名送番畀《信報》。
經濟E講「一日老闆，永遠老闆」，我地口中嘅「老闆」，包含「上司」嘅意思，以前曾特首做司長之時，就以「老闆」一詞嚟講佢嘅上司董特首。中國官場傳統，尊重老上司，商場亦然，不過二十一世紀咯，年資唔係最重要，往往係有能者居之，無分先後，達者為師，左丁山就認識一啲年青校友做咗年長師兄嘅「老闆」。上司猶自可，真係出糧畀你嘅「老闆」就千萬不能得罪，在職時如此，離職後亦不可忘記，要必恭必敬，因住隔咗二三十年後再碰頭之時，舊老闆會失驚無神當眾大喝一聲：「老左，當年我請你o架，千幾蚊一個月，有冇待薄你呀？」咁就唯有陪笑幾聲低頭不語啦。