澳門人有福了，事關立法會選舉拉票戰正式開始，16個組別爭奪12個直選議席。嚟緊十幾日，澳門街坊大把餅券、晚飯、禮物，飲飲食食有排嘆。八方無福消受，不過隔岸觀火都好，睇吓班候選人點樣造勢鬥法，自有一番情趣。
澳門第四屆立法會選舉今個月20號舉行，噚日凌晨開始法定競選宣傳期開始，夜麻麻，澳門市中心有過萬人聚集，各路人馬着晒唔同顏色嘅衫，搖旗嗌口號造勢，唔知仲以為社團晒馬。
宣傳單張下苦功
候選團隊谷票各出奇謀，周街叫囂、請飲請食之外，候選人仲好落力搞好個人形象。所以唔少候選組別喺宣傳單張下過苦功，尤其幾位媲美日本民主黨「女刺客」嘅女候選人。好似6號候選名單「公民監察」嘅林玉鳳，自稱「6小鳳」；酒店業猛人周錦輝今年唔再參選，全力支持老婆陳美儀出戰。
芳齡44歲嘅周夫人，好有大家姐風範，宣佈參選當日柴九上身，以「人生有幾多個十年」形容自己嘅心情。反而一向靚絕人寰嘅四姨太梁安琪，競逐連嘅宣傳單張好鬼平實，唔通四太坐定粒六？定係掛住賭王病情，冇心情扮靚？