七年前，靚佬湯有套《未來報告》（MinorityReport），大橋講預知殺人，劇情都算新鮮刺激，但令我到今日仍然記得嘅，係戲內大量出現嘅未來汽車。
故事設定喺2080年，汽車科技進化到全自動，一條Track內有幾千架圓碌碌「汽車」高速行走，仲會90度垂直上落，相當之鬼馬。到中段，靚佬湯大逃亡，匿到去凌志造車廠同敵人捉迷藏。睇住一堆機械臂左穿右插，短短幾分鐘就砌好架車，噴埋油，車都唔使驗，主角就即場揸走揚長而去，夠晒神奇！
未來凌志科幻感十足，雖然聽古唔好駁古，但你諗諗，七十一年後嘅LS、GS甚至IS變成玩具咁款，仲要無改裝空間，唔可以玩吓引擎換吓包圍，車迷會唔會變得好空虛？
記者：徐影龍