今個星期碟場十級慘淡，完全沒有何官能刺激或早已期待的大片推出。聽舖頭講，暑假一完係咁，現在惟有等暑假時上畫的電影出碟。結果，我因巨星卡士，也因談及傳媒，揀了套口水戲，是羅素高爾、賓艾佛力的《頭條殺局》。一對好友，一個記者，一個政客，睇佢兩個互相利用。
記者︰陸俊雄
睇文戲張力
睇對上一套講傳媒的電影，太耐了，竟然是支持港產《A1頭條》。呢套《頭條殺局》故事宏觀好多，其實係改編自英國BBCOne的電視劇集《StateofPlay》，由一個國會議員的女助手突然死了開始，越揭越多關於婚外情、政治陰謀、報紙爭銷量等等的現實課題。
黑位極多
係咪心諗，口水戲的場口唔會突出得去邊。你又估錯，成隻碟最大感覺係好清，佢好多室內辦公室燈光昏暗，或者摸黑進行的戲，我只係睇DVD版（呢類戲你都未必買Blu-ray），都清到無倫。
有時候仲加入些好似計緊時的背景音樂，營造分秒必爭趕出街見報的氣氛。羅素高爾在停車場被人追殺那段要睇，營造到靜得只有腳步聲，吸啖氣都出事的緊張感。而且最尾報紙印廠的收尾又要看，因為係《華盛頓郵報》的真印廠來，睇住報紙由出藍紙到上車派街，過程大多數人都未見過。
故事當然是計中計，然而大多數張力位，都係人物與人物對話，甚至我覺得訪問得像盤問之間。例如演資深記者的羅素高爾用極為討厭的手段逼人爆料；其好朋友，做議員的賓艾佛力卻一直不盡不實。演過英女皇的海倫美蘭，今次做總編，努力要令頭條唔好衰畀同行睇，兼且經常擺起副嘴臉。政界和傳媒之間，真係咁黑暗﹖
政客老婆EQ高
諷刺現今美國的社會政治，《頭條殺局》唔係第一套。不過有段幾到肉的，原來收了在Bonus的刪減片段之中，係講賓艾佛力搭上女助手後，出咗事，老婆仲要出來支持老公，幾咁希拉莉。仲要衰到話睇新聞睇得多，老婆話估唔到今日輪到自己。係囉，點解個世界咁多假仁假義呢？
《頭條殺局》DVD$135
