古語有云，飲水思源、慎終追遠，疑似中共黨員CY梁振英不忘典，噚日揸住紅色旗仔，歡送浩浩蕩蕩出發去井岡山嘅600幾人。呢個唔係普通旅行團，係慶祝建政60年嘅「共和國之旅」，成員包括民政事務總署署長陳甘美華、民建聯陳鑑林、李慧琼、曾經係民建聯嘅梁美芬，連曾憲梓都有份。
井岡山被稱為「革命搖籃」，係中共聖地，好多黨員夢寐以求親身去朝聖，至於團員入面有幾多係黨員，當然冇人知。CY唔知係咪去到厭，噚日送行後冇隨團出發。CY現身咁有象徵意義嘅朝聖之旅送行儀式，仲使問佢係咪黨員？佢噚日話唔想再回應呢件事。
烈士陵園植樹
話說當年老毛率領工農革命軍同南昌起義部隊喺井岡山會師，自此井岡山就成為第一個農村革命根據地，後來嘅打江山之路亦由此而起。CY想順利登上特首寶座，其實應該重回井岡山，話唔定可以得到靈感痛擊政敵，回港英雄造時勢打下江山。
呢個團抵埗後會在北山革命烈士陵園獻花同植樹，據講係首個香港團體獲准在陵園植樹，好珍貴咁話。紅色朝聖之旅多達官貴人，主辦單位特別安排醫生隨團，每人更獲發一個生活用品包，內有太陽帽、雨衣、藥油，連面膜都有，偉大嘅黨真係體貼到難以置信。