做舞台劇《東宮西宮》一炮而紅，打響知名度做埋議員嘅陳淑莊，闊別舞台一段日子，今年重操故業，月中再演出《東宮西宮之捱鬧的當奴》。雖然公演在即，但原來佢仍然未收到劇本，陳淑莊噚日同八方講，其實幾乎次次開騷前都好遲先有劇本畀演員，所以佢都未知《捱鬧的當奴》講乜。
據知初時編劇想陳淑莊做番自己，即係飾演陳議員，不過佢話以前已做過呢個角色，自己悶亦怕悶親觀眾，為咗令觀眾有新鮮感唔好凳洩憤，所以佢向話事人要求做新角色，卒之得償所願，今年粉墨登場飾演西九龍皇帝個老婆，即係「西九龍皇后」。佢話角色應該係喪喪哋，演出瘋婦有一定難度，八方覺得幾啱佢做至真。