李國能突然辭去終審法院首席法官之職，明年退任，引發政壇及司法界震動。李國能父親李福逑曾任民政司，家世顯赫，係李家國字輩之中三位最知名嘅人物，與堂阿哥李國寶、李國章同為港人熟悉，另一位堂弟李國棟醫生係馬會董事，太太係胡寶星妹妹，即和黃副集團董事總經理周太胡慕芳家姐；喺法律界方面，佢曾經係余若薇與律政司司長黃仁龍嘅師傅，如此人物，搵邊個去代替？按牌面，大熱門人選係終審法院法官陳兆愷，若果話李國能係「貴族」，陳兆愷就係布衣，靠自己努力學習，掙扎上位嘅，代表咗香港人向上爬之奮鬥精神，如果話陳兆愷已經六十一歲，年齡不合嘅話，不免有年齡歧視之嫌。
有趣的是，李國能退休後，不能再做大律師，做乜好？完全唔做嘢嘅話，嘥啲喎，如果能夠做一啲義務工作，得唔得呀？但佢曾為首席法官，顧慮到「衝突」之事太多，就算過完冷河，恐怕仍會惹來閒話，幾難諗也，不如咁啦，到法律學院做兼職教授，一定大受歡迎。聽到一啲法律界人士話，李官會搵一個私人辦公室，方便在中環出入，碰啱中文大學法律學院以美國銀行中心二樓全層為市區教學中心，教學設備齊全，內有模擬法庭，假如李官在美銀中心搵到寫字樓嘅話，到樓下教吓書，真係方便到極，不過呢啲只係左丁山猜測之詞啫。
李國能唔做法官之後，相信會有很多時間去馬場喇啩？佢以前係馬會董事，喜愛賽馬養馬（例如歡聲、心聲兩匹），同佢傾偈傾到賽馬，就特別輕鬆，佢四十一歲之時就做馬會董事，至今仍然保持最年輕馬會董事嘅紀錄。做咗大法官之後，要為公職而犧牲業餘興趣，佢幾乎絕跡馬場，偶爾出現亦只係為公事。好咯，下一個（二○一○/一一）馬季，佢可以隨時到馬場與朋友講馬嘞，話唔定佢件粉藍衫紫帽綵衣會再於馬場出現。
李國能退休，引起諸多猜測，但左丁山與佢相識二十年，好相信佢言必由衷，唔會講嘢口不對心，《南華早報》引述佢用英文講：「Iwanttomakeitabsolutelyclear,lookingyouintheeye,thereasonsstated....aretheonlyreasonsIhavetakenthisdecision.」講得斬釘截鐵，左丁山信晒！