家啲AV發燒友喺屋企一定有套家庭影院煲碟，享受靚聲靚畫之外，仲鍾意匿埋喺房上網睇免費電影。但小藍早幾日同資訊保安技術公司Symantec香港區系統工程經理李輝傾開偈，佢話發現黑客近期鍾意用免費任睇新上畫電影作餌，誘使網民下載植入惡意程式，盜取網民資料。
Windows同Mac都中招
李輝話，啲黑客會喺blogspot.com呢啲有信譽嘅網站建立網誌，表面提供免費電影，骨子裏當網民點擊播放器視窗嗰陣，就會將一個偽裝成編碼器嘅惡意程式下載到電腦，或者轉移到一啲含有惡意程式嘅網站。呢啲毒網會根據瀏覽器代理程式嘅類別，將針對Windows或Mac系統嘅特洛伊木馬程式下載到電腦，「唔理你係Windows或Mac機嘅用戶，一睇呢啲免費電影即刻中招。」
佢又話，社交網站近期都成為黑客播毒嘅途徑，好似最近有黑客透過內地著名嘅人人網，假裝成用戶嘅朋友發出訊息，邀請觀看PinkFloyd樂隊嘅《WishYouWereHere》錄像短片。網民一點擊收看，蠕蟲便會入侵電腦，繼而向名單上嘅聯絡人逐一發出相同邀請訊息，不斷散播蠕蟲。
李輝提醒用戶，防止黑客入侵最基本要安裝防毒軟件，同埋唔應該隨意由非正式途徑下載各類檔案，包括應用、軟件更新或編碼器等，並謹慎使用社交網站同電郵。小藍舉腳贊成，便宜莫貪。