胡諾言嘅老婆仔陳琪前日剖腹生咗重7磅4安士嘅大眼B女，一家三口噚日仲發咗相畀傳媒分享喜悅，大眼B女嘅皮膚白裏透紅，可愛到不得了。新任爹哋胡仔抱住囡囡嘅手勢唔單止好純熟，仲好肉緊㖭。
胡仔話陳琪陀BB時，日日食燕窩補身，見到囡囡皮膚又白又滑，佢話乜都抵番。胡仔又話陳琪會用人奶餵BB，除咗希望加深親子關係，又可以增強BB嘅抵抗力，胡仔噚日喺電話話：「太太餵人奶又可以快收身。」佢仲話唔介意以全家福做噱頭拍廣告，總之賺多啲奶粉錢同教育基金緊要喎。
李丞責讚勤力女
由於胡仔同陳琪嘅英文名係Jack同June，所以都打算同囡囡改番個J字頭嘅英文名，中文名就交畀堪輿家兼老友李丞責操刀。講到對囡囡嘅期望，胡仔話：「我希望佢健康快樂成長，做個有內涵嘅人。我明白做藝人好辛苦，所以都唔係咁主張囡囡入行，但會尊重佢嘅選擇。」
由胡仔陳琪結婚到擇日生女兼改名，李丞責都全力包辦，佢噚日仲讚B女命格好：「B女屬牛，性格好勤力，但會有啲執着，咁啱佢農曆7月出世，係秋收時分，佢將來好易有收穫。B女好有藝術潛質，不妨選美或做藝人。」