賭王何鴻燊因跌傷頭部，一直喺半山港安醫院留醫，至今已經39日，仲未有出院迹象。賭王目前傷勢同復原進度成謎，何家上下只係不斷向外講賭王情況「幾好」、「好好」，實情係點，外人唔知。
噚晚三太陳婉珍探完病，透露賭王病情有顯著進展，八方記得賭王已經蘇醒，就問吓三太賭王有冇睇吓報紙，了解時事，三太就話：「佢睇電視。」至於幾時出院，佢咁講：「幾時就唔知，但係好好啦。」二房幾個女兒超鳳、超瓊、超蕸亦有現身醫院。之前有傳賭王留院個幾月，醫療費逾億元，前晚四太梁安琪就話：「吓！啲消息邊度嚟o架，冇留意喎。」咁又係，賭王睇醫生，邊使睇單o架！