劉德華隱瞞已婚事件令他備受抨擊，形象受損。當年五虎之一的梁朝偉和妻子劉嘉玲在京港兩地，各自出言力撐劉德華。去年公開婚事的嘉玲希望外界體諒華仔的壓力及無奈；偉仔則謂華仔的私事沒有害人，無分對與錯。
劉嘉玲前晚在中環出席MarcJacobs時裝騷，談到劉德華最近被揭已婚，她透露曾以SMS恭賀華仔，又為好友講好話，她說：「呢個社會好多紛擾，網絡世界好發達，是是非非，真真假假好難斷定，我哋應該改正自己嘅態度、心態，心態好，睇乜嘢都係美麗，心態唔好，睇乜嘢都係醜。我會用好嘅心態去祝福，佢背後有好多無奈、壓力，美麗嘅誤會可以接受，唔係跣人、害人就得。」
坦然公開婚事
對於華仔自稱因要人工授孕才結婚，嘉玲說：「乜嘢理由都好，都接受。」她自言未跟梁朝偉商量過，故不知可會接受人工受孕，但尊重天意不心急。
嘉玲去年7月和偉仔結婚，之前一直隱瞞婚事，至最後一刻才公開，問她可有掙扎過？她說：「每個人出身、工作環境都唔同，可能佢（指華仔）都好無奈，我哋唔係佢，想像唔到佢嘅壓力。我公開係好坦然，冇掙扎過，我個人好任性，唔可以被收埋。」她更直言做不到如朱麗倩般，做個隱藏在男人背後的女人，但慶幸梁朝偉不是偶像人物。
FBI查偉仔買賣
偉仔昨日則在北京故宮出席卡地亞珍寶藝術展，有收藏古董的他透露曾因買雕像被FBI上門調查，原來他經佳士得購得的木雕佛像屬於文物，不能買賣。對於多名藝人婚訊曝光，他說：「任何一個人都有私人嘅權利，私人事唔講，如果冇傷害人，係冇對或錯。」對於華仔被指講大話，他說：「兩方面睇啦，到咗某一年紀，結婚、組織家庭都好正常，fans陪伴成長，都會明白同接受。」
採訪：羅慧敏、林妃
攝影：林德雄