上月盟主
上月得眾仁哥仁姐讓路，讓小弟一嘗盟主之位；周六國際賽林立，遍及全世界各大洲，不過小弟對呢類國際賽有戒心，始終球隊唔係個個星期打開，狀態、默契好難跟，下一場又唔知幾時打，要報仇都唔係咁易，所以重心都擺番常規嘅日乙聯賽，捧FC岐阜主場對湘南比馬可以不敗。
岐阜靠主場搶分
周中打咗一輪日乙，相信捧開熱門嘅球迷都好大機會損手，事關湘南比馬、甲府風林、札幌岡薩多呢啲熱門都贏唔到，係大阪櫻花叫做對辦，可以小勝富山勝利一粒；其中對湘南比馬呢隊中田英壽母會球隊有啲失望（舊名為平塚比馬），對住日乙魚腩櫪木SC，唔止贏唔到，主場更只攻入櫪木SC一粒波。睇番比馬呢期攻力認真麻麻，自7月22日作客輸俾仙台維加泰1:2起計，連續9場聯賽未嘗一場入波多於一粒，即係話只要對手攻入比馬一球，佢哋就肯定贏唔到。
聽日比馬就作客FC岐阜，捧FC岐阜唔單止因為佢哋上場狂炒熊本羅亞素5:2咁勁，而且欣賞佢哋嘅主場實力，近13場主場只係一敗，當中更有擊敗榜首大阪櫻花嘅紀錄；而且比馬今仗唔止有田村雄三停賽，菊池大介又要代表小國腳，3號射手田原豐又因傷缺陣，點計都係捧FC岐阜「主勝」。
櫻花風林旺和再追
同日日乙就有場前列大戰，由榜首嘅大阪櫻花主場對第4位嘅甲府風林，兩隊近期都旺「細」，櫻花中場香川真司係就係好勁，上仗又靠佢入波贏富山勝利，但論對賽往績，風林成日作客迫和櫻花，季初首循環對碰，風林就作客悶和櫻花0:0，今仗冷敲「主客和」D之餘，揀埋兩個和波0:0同1:1波膽。
牽牛
近5場往績：LLWL/