新學年剛剛開始，香港大學就迎接一個「黑色星期四」，醫學院前院長林兆鑫承認一項公職人員行為失當罪，被判囚25個月；教育學院副教授TerenceJosephShortall兩項非禮罪名成立，被判監九周兼罰款5,000元；另有一個文學系二年級男生因不堪考試壓力走去高買，噚日被判罰款3,500元，一日之內共有三個前任及現任師生被判刑，相信好多港大師生、舊生覺得面目無光。
「開心樹」被斬行衰運
正所謂十年樹木，百年樹人，港大百年老店，卻一夜之間多咗幾個罪人，難怪港大要急補鑊，強調會加強德育教育提升師生操守。八方噚日問一個教授，加強德育教育有冇效o架？佢話如果不具名評論，佢個人認為冇乜實際作用，學生喺小學、中學上得少德育堂咩？讀大學仲要上德育堂嘅話，真係侮辱咗校訓「明德格物」！
另一個校內人士就話，港大近嚟咁多是非，可能真係流年不利，佢講笑咁講，話唔知係咪同大學圖書館外中山廣場棵40年老樹石栗被斬有關！呢棵樹被稱為「開心樹」，陪伴幾個年代港大師生職員，但因為受真菌入侵，嚴重腐爛，專家認為冇得救，所以今年6月被斬；呢位人士話雖然唔知棵樹對風水有乜影響，不過大樹一去，感覺真係幾唔自然，希望校方快啲種番棵新樹就好嘞。
個人操守有問題，唔好咁迷信啦，不過講開又講，林兆鑫由「御醫」淪為階下囚，相信親者痛，仇者快，港大有人慨嘆林教授成也超人、敗也超人，若非佢穿針引線獲李首富捐出10億元，以醫學院冠名權答謝，搞到校內校外樹敵無數，天怒人怨，家陣可能唔會有咁嘅下場，超人曾揚言「不義而富且貴，於我如浮雲。」林兆鑫家陣應該體會到呢兩句話嘅意思。
物先腐而後蟲生，如果唔係大學監管制衡制度有漏洞，高層又點可以輕易做手腳呢？如果早啲發現真菌蛀樹，「開心樹」亦唔使倒下，有蟲嘅話，應該盡快杜蟲絕不能手軟，否則醫學院又爆醜聞，豈不愧對曾就讀港大醫學院前身香港西醫書院嘅孫中山！
mailto:[email protected]