殿堂級扮嘢能手盧海鵬喺《香港亂噏》玩盡高官名人，扮「教肉局局長孫明洋」令唔少人笑爆嘴，原來正牌教育局局長孫公都有睇呢個節目，仲讚鵬哥扮佢維肖維妙，神態、語氣幾可亂真，造型都有七、八成相似，唯一美中不足係身形模仿唔到十足十。正牌孫公又話好彩鵬哥身形唔似佢，孫太一定唔會認錯人。
議員叫陳維安落區
為官多年，孫公二撇雞形象深入民心，教育局副局長陳維安上任逾一年都形同透明，呢方面真係冇得同孫公比，議員林大輝話陳維安應該將勤補拙，多啲落區體驗民間疾苦。佢噚日同八方講，上水鳳溪公立學校有好多學生要跨境由深圳嚟香港返學，但由於政府部門官僚措施，取消酌情發出禁區紙，令學童舟車勞頓之餘仲易生危險。
佢身為鳳溪校友，自言當年每日元朗屏山去鳳溪返學，來回要四個鐘頭，所以感同身受，打算邀請陳維安一齊扮番次「超齡跨境學生」，親身體驗長途跋涉返學之苦，會制訂便民措施，唔好再虐待小學生。