紅魔球迷等咗成年，終於等到夏格維斯返嚟嘞！曼聯日前遞交歐聯參賽球員名單，家養緊傷嘅夏格維斯都榜上有名，咁即係話呢位英格蘭中場好快可以返球場比賽。咁到未算，曼聯仲俾權威財經雜誌《福布斯》選為全球最有價值球會。而佢哋一次過收到兩單好消息，可算係雙喜臨門。
現年28歲嘅夏格維斯對上一次幫曼聯披甲，係喺舊年9月21日場英超，當時仲幫球隊作客打和車路士1:1，之後佢就因為兩個膝頭有事而唞到家。早前佢做完手術之後，康復進度理想，最快可以喺今個月23日返練習場操練。有見及此，領隊費格遜亦決定幫佢註冊踢歐聯分組賽，雖然佢肯定踢唔到今個月中作客比錫達斯嘅首輪分組賽，但就有望喺次輪迎禾夫斯堡披甲。
夏格維斯下月歐聯復出
之但係，費格遜擔心夏格維斯成年冇喺頂級賽事比賽，狀態同信心都唔夠，所以唔會咁心急放佢落場，預計到下月21日作客莫斯科中央陸軍嘅第3輪賽事，先考慮畀佢踢。
夏格維斯喺07年夏天由拜仁慕尼黑以1,700萬鎊加盟曼聯，講技術佢唔算好好，但勝在多才多藝，除咗可以踢防中兼且可串演左右兩閘，而且仲屬於大賽球員，賽事越重要表現越好。曼聯可以喺08年重奪歐聯，佢實在居功至偉，其中4強對巴塞隆拿更係佢喺紅魔嘅代表作。家陣佢終於傷癒復出，對紅魔爭取英超4連冠同埋挑戰歐聯，絕對係利好消息。
成全球市值最高球會
曼聯啲喜事一單接一單，除咗即將有夏格維斯傷癒復出，日前更被《福布斯》選為全球市值最高嘅球會。估計呢間英超球會值成11.7億鎊（約148億港元），比以9.7億鎊排第2嘅美式足球隊達拉斯牛仔，高出成2億鎊。至於西甲嘅皇家馬德里更加輸曼聯幾條街，只係值8.2億鎊。咁又係，我求大俠無論喺公司抑或喺街，梗有一個紅魔球迷喺左近，所以曼聯咁值錢，真係有理由o架。