永隆銀行天價易手、服裝企業堡獅龍（592）話賣唔賣亦炒作一番，即刻喚起各方友好關注邊啲家族生意有賣盤機會，香江老字號維他奶（345）上世紀40年代成立至今，眨眼快將踏入第七個10年，執行主席羅友禮年屆68歲，領導維他奶已經有37載，仍然活力十足，眼見當下有企業趁市況好轉賣盤，佢噚日出席股東會後斬釘截鐵話：「從未考慮過。」
家維他奶董事會成員，除咗羅友禮外，仲有兩位羅氏家族成員，包括佢家姐羅慕貞及胞妹羅慕玲擔任非執行董事，加埋超過兩百歲。之但係，連同高級管理層成員在內，仲未見到後生一輩嘅蹤影。
無諗過賣盤
羅友禮介紹，有一位後輩正為公司效力，但並非留守香江發迹地，亦唔喺最有增長潛力嘅神州大陸，呢位後輩只係負責海外業務。佢話維他奶唔係一定要家族人員接手，而係要能者居之喎。