中國有錢人越嚟越多，香港正銳意發展成為私人理財金融中心，服侍呢班貴客。據環球私人理財金融中心瑞士嘅經驗，要做呢班富貴客戶，唔單止金融服務要周到，仲要配套服務符合貴客要求，例如要有完善嘅私人包機服務。
私人包機需求大
空中巴士行政及私人航空市場總監陳明璋噚日話，瑞士嘅私人包機業務，係因當地嘅私人理財金融業務帶動而相當蓬勃，原因係嚟自全球嘅富貴客戶要去瑞士處理自己嘅巨額財富，唔會坐一般航空公司客機，而係由瑞士嘅銀行安排私人包機，單獨接載客戶到臨，因為呢班貴客都唔想俾其他人知道佢哋出入瑞士嘅行蹤。
空巴10年來已售出150架，最低消費約6200萬美元（約4.84億港銀），當中20架賣往大中華區；空巴相信，隨住中國經濟不斷增長，中國市場將會係空巴嘅主要業務增長點。