郭晉安在無綫劇《古靈精探B》要與只有8個月大的BB演對手戲，對他而言一點難度也沒有，因他訓練有素，常與歲半大的乖仔Brad鬥演技。安仔更自爆不准囝囝看劇集，怕他變老人精。
無綫劇《古靈精探B》中的B仔，遺傳了爸爸郭晉安的超能力，協助父母查案。很多演員都怕與小朋友做對手戲，但已是爸爸級的安仔卻大無畏，因他家中有個歲半大的小霸王，經常與他鬥戲。
安仔提起兒子便一副冧樣說：「我喺個仔面前成日笑，因為我想佢知道開心嘅感覺，不過如果佢扭計，我會扮喊，個仔個樣就會好似怕怕咁，其實佢知道係唔開心嘅表現，有時囝囝都會對住我哋假笑，咁我就會同佢講唔好對住爸爸做戲。」
怕變老人精
安仔自言與太太歐倩怡有共同的教仔方式，其中入門兩件事是十分同心的，一是不能體罰，二是不能看劇集，安仔笑言囝囝只能看卡通台，因為不想他失去童真，變成老人精。
為了在兒子面前做好榜樣，安仔自言改變很大，他以前是暴走快車黨，但如今卻是慢世魔王黨，他說：「以前成日被捉到炒牌、危險駕駛，家安全車速50、60公里，唔爬頭，唔違法，我計過數原來踩行油都只係快5分鐘，多謝個仔令我明白到安全嘅重要性。」安仔又笑言希望過兩年才添丁。
採訪：陳寶明
攝影：陳慧安
服裝提供：DKNY
場地提供：DKNY、西苑酒家
