之前講過月供股票嘅問題，前排睇理財版一個關於月供基金嘅專題，裏面提到基金有唔少隱藏收費，對於嗰啲供款唔多嘅投資者，隨時一半供款用嚟支付雜費，真係供基金嘅錢唔多。橫掂要供，不如直接供股票，但又想降低風險，所以揀盈富基金（2800）嚟供，一次過一籃子恒指成份股。不過理財版計過數，若遇着市況不濟時，供盈富嘅回報未必好過供基金。
其實投資者可以用期權降低入市成本，就以敏妮之前供嘅港交所（388）為例，敏妮供咗年幾，平均價約116蚊，家陣沽出當然有錢賺，但供咗咁耐，當然想收穫豐厚啲先沽，所以就做咗個港交所嘅coveredcall。
之前有位叫CK嘅讀者喺敏妮Talk留言，問乜嘢叫coveredcall。所謂coveredcall係指，揸咗正貨嘅人，沽出一個認購期權（calloption）畀人，自己收期權金，人哋就揸住個認購期權，有權向你買你揸住嘅正貨。當然佢唔係任何時間都可以要求你賣手上嘅貨畀佢，除非隻正股股價到咗行使價。
收期權金幫補
以敏妮為例，敏妮揸咗港交所想沽，但嫌家陣個價唔合心意，所以就喺某個「高位」沽咗個認購期權畀人，收期權金。如果港交所唔到敏妮心中嘅「高位」，敏妮收嘅期權金就袋袋平安，如果到價，咪將揸住嘅港交所以協議嘅行使價賣畀人囉。
如果隻股票跌穿埋平均買入價又點？好多人睇到自己所持嘅貨「貶值」，都唔捨得沽，因為反正你月供股票都係長線投資，其實喺上面個期權策略度，透過不斷做，不斷收期權金（假設一直未到價），無形中已經將所持嘅股票平均成本價降低。當然咁樣做，只係講緊嗰啲真係有望翻身嘅藍籌股，而唔係二、三線股仔，再講太細嘅股仔都冇得做期權。
溫敏妮