市場氣氛改善，今個月11隻新股有望生得逢時。兩隻焦點股中冶同國藥（1099），點都要入飛抽吓，其餘咁多隻點揀好？
招股反應靠包裝，實力雄厚嘅會引入星級基礎投資者入股，市傳中冶已有中信泰富（267）及中投等撐腰，甚至有神秘人背後以溢價向富豪分貨，風頭一時無兩。冇熱炒概念的，基金未必吼，惟有靠巨星打打氣。雜誌社現代傳播（072）有李連杰、賣男裝嘅利郎（1234）將有吳彥祖現身推介會，到時萬人空巷的新股騷，肯定吸引媒體閃光燈。
唔係反對用明星，但睇番隻361度（1361）同霸王（1338），有「安祖娜BB」同「動L」咪又係咁，361度得3分鐘熱度，破發收場；霸王雖未跌穿，但就繼續破底式下跌，新低完又再創新低。
專營中價男裝的利郎，雖然搵咗我至愛嘅人氣靚仔吳彥祖代言，但好難想像佢以利郎嘅中坑Look粉墨登場。呢間專賣男裝返工衫同Polo恤嘅連鎖店，全國分店超過1000間，年銷量達5億元人民幣，經營路線有啲似李寧（2331）同安踏（2020），都係希望以自己建立的品牌征服全中國，但問題係︰究竟呢片藍海有幾深？
揀新股要睇基本因素
中國已晉升全球第二大高級消費品市場，去年中國人買奢侈品花咗超過86億美元，係世界各地名牌時裝的兵家必爭之地。起步算遲嘅RalphLauren，年初向廸生（113）攞返亞洲代理權，打算中港兩地開多15間分店，同LV及Gucci搶生意。
貴價嘢睇實中國市場唔在講，Nike見家鄉銷售去年跌緊2%，中國逆市竟有6%增長，急急將高比拜仁Pack箱寄去中國做宣傳。據悉現時中國15至24歲年輕人超過2億，整個時裝市場商機無限。
市場雖大，能否賺大錢要睇準消費者口味。據研究機構LuxuryInstitute統計，內地最受歡迎男裝品牌係GiorgioArmani、LV、DiorHomme同PaulSmith，女裝就以Prada、YSL、Hermes最多人買。綜合得出結論就係︰唔貴唔買，本土貨亦唔買。
想同一隻股份談戀愛，要揀高增長股，近期佼佼者係京信通信（2342），成績好又肯派紅股，就好似紫金礦業（2899）初上市時都猛送紅股，股東歡喜，股價當然威威。至於抽新股遊戲，喺短線升得好好睇睇後，最終仍會回歸基本因素。
胡孟青