林子祥（阿Lam）和太極前晚聯手在澳門開騷，雖然是慈善演唱，但入座率只有6成，不少座位空空如也。當阿Lam興致勃勃走下台和觀眾握手時，一不留神竟走到「吉位」，阿Lam眼見唔對路立即快閃到觀眾堆前繼續握手，身手異常敏捷。
久未合作的林子祥和太極前晚在澳門綜藝館舉行「林子祥．太極同力齊心雙慶澳門演唱會」，雖然他們實力毋庸置疑，音樂會又是慈善籌款性質，但入座率卻麻麻，全晚只有6成滿座，猶幸觀眾反應尚算熱烈。甫開場由一班穿上bratop的女舞蹈員大跳熱舞，之後由太極打頭陣，再到阿Lam上場，其後雙方有合作crossover。
事後詐儍唔認
阿Lam演唱一曲原本和老婆葉蒨文（沙麗）合唱的《選擇》時，由於當晚沙麗未有到場，他笑說：「唱情歌梗係要搵對象，但我個對象唔喺度，有冇人想同我合唱？」有位女fans隨即舉手，但她的廣東話不太純正，女fans說：「我識少少。」但卻把「識」講成「死」，阿Lam在旁也忍不住發笑。
唱至中途，阿Lam興起走落台和觀眾握手，未料他一不留神竟走到一排「吉位」處，阿Lam眼見前面沒有觀眾才如夢初醒，立即快閃走到另一邊和其他觀眾握手。事後慶功時提到觀眾比較慢熱，太極眾人說：「開頭係有啲，但後來OK，都好熱呀。」問阿Lam走到吉位時有何感覺？他即詐儍扮懵說：「吓，係咩？唔覺喎。」記者指座位空空如也，阿Lam續說：「係咩，唔知，唔覺，我投入嘛。」太極竟出口笑窒阿Lam：「係喎，冇人你都握咁耐。」
讚太極變乖巧
至於老婆沙麗為何不來捧場？阿Lam說：「佢自己有嘢做，要打波，遲啲要比賽。」阿Lam和太極不約而同表示希望再有機會合作，阿Lam大讚各人比以前乖巧，問到他們以前如何百厭？阿Lam笑笑口說：「總之家成熟，唔遲到、唔甩音，好乖囉。」前晚適逢鬼節，太極笑稱當晚尾段時又斷線、煙花效果又出錯，覺得很邪。
採訪：胡比 攝影：彭琮然