日本大選，自民黨大敗，民主黨大勝，取得眾議院近三分二議席，以後四年控制大局。自民黨要翻身嘅話，除非民主黨自我毀滅。自民黨近四年有三個首相，即安倍晉三、福田康夫與麻生太郎，全部係太子黨，阿爺已經係知名政治人物。呢班政治貴族第三代皆是無料人物，生於富貴之家，就讀貴介名校，但原來全是劉阿斗窩囊之輩，自民黨戰後近六十年基業，就敗在三位第三代人物之手。
民主黨領袖鳩山由紀夫嘅家世，一樣咁顯赫，鳩山由紀夫已是鳩山家第四代掌舵人㖭，而且係東京大學畢業，史丹福博士，讀書叻過晒安倍、福田、麻生。咁嘅人物，會唔會又係劉阿斗呀？據肥仔K講，一丘之貉啫，唔會叻得去邊，畢竟上幾代太醒，由紀夫未捱過鹹苦，唔知民間之事。睇牌面，佢與麻生毫無不同。不過咁，邱吉爾講過：民主係一個壞制度，但所有其他制度更加壞，民主選舉唔可以保證選到叻人，捧叻人上位。但西方選舉真諦係讓人民握有手中選票，以選票趕走壞蛋，英文所謂Votetherascalsout，現在日本人民就係運用這項權利，將無能平庸嘅自民黨趕走。佢哋選民主黨上台，未必係啱o架，畀鳩山由紀夫等人一個機會去試一試而已。如果鳩山及民主黨人唔生性，浪費時機，上台後照樣做唔到事，搞唔好經濟嘅話，下一次選舉可能會輸番畀自民黨，就好似台灣民進黨結束國民黨一黨獨大局面，但上台後大肆貪污，浪費八年時間，於是台灣人趕走民進黨，搵番國民黨人管理政府。
鳩山由紀夫是否另一位馬英九，贏得漂亮，上台後就畏首畏尾，議而不決呢？目前唔敢講，睇耐啲先。如果佢冇料到，明年日本參議院選舉就會拖累民主黨。我哋香港人都唔知幾恨有同樣選舉權，曾特首在施政報告唔可以唔講番幾段嘅。冇選票就唔以Votetherascalsout，怨氣出唔到，咪乜嘢都反對囉，目前特區政府推出甚麼政策都有人反對，曾特首知道深層原因嘅。