新聞處處長黃偉綸呢個星期一到美利大廈返工，喺老頂民政事務局局長曾德成安排下，噚日旋即在環境清幽嘅海防博物館第一次以處長身份見傳媒。作為煲呔心戰室一名猛將，佢話已經預咗24小時接記者電話，若果夜晚電話覆得遲千祈唔好見怪；仲問個別傳媒機構有嘢佢可以搵邊個做回應，做足資料搜集，功夫未知，單睇個樣就好有戰鬥力，唔打得都睇得。
對於佢嘅新聞處團隊，處長化身擦鞋匠，話個個好勤力，「夜晚8點都見佢哋熱情高漲」，可以同佢哋一齊做嘢覺得好高興。黃偉綸過去有四年喺經濟發展及勞工局處理民航協定，對民航條例好熟；其次係出入境安排，不過呢啲對新工作崗位都似乎係鍛煉，佢日後拍住特首辦主任譚志源，工作性質係做拆彈專家就真。
上任新聞處處長馮程淑儀調位去咗康文署做阿頭，都係曾德成旗下，所以噚日個酒會馮太都係主角，佢話調咗位最唔同係每朝可以瞓多半個鐘。