滙豐銀行業務遍全球，各位管理層日理萬機，相信唔少人都想跟住呢批大班偷師，一位本港中六學生就有呢個咁特別嘅機會。話說滙豐贊助一個由國際成就計劃香港部主辦嘅「學生營商體驗計劃」，勝出成為「全年最佳行政總裁」嘅同學，就可以跟住滙豐執行董事王冬勝半日，化身為「影子大班」，體驗銀行高層嘅日常工作。
學習應對傳媒溝通技巧
就讀保良局八三年總理中學嘅中六學生梁子俊，就有幸成為銀行界梁朝偉嘅工作影子，喺上個月24號同王冬勝直接對話，唔單止跟住王冬勝出席記者會，學吓點樣應對傳媒，同時，梁同學又旁聽王冬勝嘅一個電話會議，了解管理層思考模式同埋溝通技巧。
度過半日大班影子生活，梁同學又有咩啟發呢？梁同學話，王冬勝嘅管理手法，令佢明白作為管理層，要相信自己下屬，仲要知人善任，王冬勝又提點佢對人哋嘅意見要加以分析，仲要懂得獨立思考。
梁同學年紀輕輕，就已經成為「全年最佳行政總裁」，過多十年八載，話唔定會成為銀行CEO呢！
李華華