美國銀行高層薪酬高，一向被外界批評。噚日有調查發現，20間接受華府借錢拯救嘅美國銀行CEO，舊年平均人工冠絕全國企業高層，完全冇受金融海嘯影響。
華盛頓政策研究所（IPS）最新調查，呢20間美國銀行，佢哋CEO舊年平均年薪達1380萬美金（約1.08億港銀），較標普500指數大企業CEO嘅平均年薪1010萬美金（7878萬港銀）高37%，比監管佢哋嘅證監高層人工多85倍；如果同普羅大眾打工仔相比，更高達430倍。
舊年金融海嘯下，唔少銀行高層都唔收花紅，但佢哋身家冇縮水，因為佢哋唔少喺低位獲配認股權證，隨住股市反彈，佢哋嘅認股權證亦水漲船高，一年升值9000萬美金（約7億港銀）。
資料顯示，呢20間銀行頭五大高層，過去3年共收達32億美金薪酬，06年同07年同12億美金，舊年雖減少33%，但都收成8億美金。