公民黨話搬竇話咗好耐，八方聽聞將近成事。公民黨中人早前不斷呻，話家陣喺灣仔永亨金融中心嘅總部雖然位置靚，但租金揦脷，惟有另覓安樂窩。有位支持者知道佢哋咁頭痕，主動送大禮，將一個位於北角嘅自置物業，以友情價租畀佢哋落腳，等公民黨唔使再捱貴租。
湯大狀證實有人仗義襄助，但強調都係以市價出租。呢位黨友一次過同佢哋簽咗五年約，等佢哋專心發展黨務。據聞新竇大過舊時幾百尺，雖然冇咁近中環，但都算物超所值。八方聽聞公民黨最快10月、11月新竇入伙。由於租金支出少咗，公民黨日後可以向每個地區支部投放多近兩成資源，協助開拓地區事務，並且寄望2011年區議會選舉係省靚招牌之作。