小朋友愛《00》更愛《Seed》，舊相好念念不忘RX-78、阿寶加馬沙同娜娜夾喺中間。所以每逢日系新主機推出，都會有高達作品護航。9月1日PS3纖薄版推出，呢隻《機動戰士高達戰記》就充當義氣仔女。畫面寫實，支援4人合作、8人對戰，已經夠照，你仲出旺角打機？
文：阿洛
型男索女 原創故事
遊戲標題係《BattlefieldRecordU.C.0081》，0080係《口袋裏的戰爭》，《星塵回憶》發生在0083，U.C.0081發生過啲乜？就喺今次故事交代。以1年戰爭結束後嘅宇宙世紀0081年為背景，故事好簡單，就係聯邦軍部隊隊長及自護軍反攻部隊隊長各自率領部屬打餐飽。睇造型比較近代風格，即男角俊逸，女角硬朗中有點萌，簡單講句係型男索女組合，故事模式應該玩得更投入。
自組機體 7號機有計
原創故事，就係自由度高，登場機體超過70種，而強化零件達110種以上，加上80種以上嘅武器組合，可以自組機體改到天翻地覆，陸戰型吉姆、水用型渣古乜樣都有。而除自改機體，仲有元祖高達、太空坦克、雷射大炮，不過當中最搶眼係原創嘅RX-78-7，即係元祖高達嘅7號機，而且遊戲中仲有重裝甲版，孭幾碌加農炮光束炮，夠火力對付戰艦或魔霸類巨型敵人。
三人小隊友誼萬歲
現代遊戲唔會俾你孤單的人、孤單一個，宣傳影片寫明：「Inthiswar,youwon'tfightalone.」任務可以同電腦組成三人小隊，仲可以點班隊友穩守或突擊。又可以上網4人合作或者8人對戰。戰鬥系統唔係街機狂Dash嗰類，係近似02年PS2版陸上行嗰隻，更有WarGameFeel，更加講求戰術。
Profile
遊戲：《機動戰士高達戰記》
機種：PS3
發行公司：NBGI
類型：動作
人數：1人，4人連線合作，8人對戰