賭王何鴻燊在家中跌傷入住港安醫院至今37日，有消息指二姨太藍瓊纓回朝接管賭業，昨日其長女何超瓊到醫院探父親時，指母親無意接管賭業。另外風水師司徒法正前晚出席首映時，暗示賭王種生基確有其事。
現年87歲的賭王何鴻燊在家中跌傷入住港安醫院，開腦做手術後留醫超過一個月，入院後有關賭王的傳聞不絕於耳，繼有消息指有姨太為賭王種生基、有探病名單後，再有報道指二姨太藍瓊纓回朝接管賭業，引起二房和四房之爭，昨日二房三姊妹超瓊、超蕸和超鳳上班前到醫院探望父親，超蕸離開時指父親正在休息。
稱母從不管公事
超瓊約下午1時離開醫院，態度友善的她似有備而來，回應母親藍瓊纓回港接管賭業的消息時，毫不猶豫地說：「冇咁嘅打算，肯定冇，媽咪不嬲都冇涉及公司嘅事，你哋搞錯晒，佢不嬲都住喺度，點解話佢返嚟？佢連街都唔出。」有傳何家有一張探病名單，超瓊也沒否認說：「係我哋一齊商討，唔知你哋啲新聞喺邊度嚟，唔係好正確。」
到晚上三姨太陳婉珍去醫院探賭王，被記者問到賭王是否需要再做手術和仍然昏迷等問題，她均說：「冇。」
司徒批賭王檻過
此外，電影《怪談》前晚在旺角舉行驚嚇優先場，風水師司徒法正被追問到賭王種生基的傳聞時，他說：「係呀，有牽涉到，我喺賭場業務幫佢做好多年，由2000年已開始，其實何生唔係好信有風水，但佢唔會禁止職員為佢健康去做，種生基對佢健康係有幫助，佢可以檻過，因為佢做好多善事，仲有一個月就可以出院。」
採訪、攝影：
IngridChan、RachelWong、EddieWong
