星期一早上七時許，告士打道近移民局及稅務大樓一段鹹水管破裂，黃泥水水浸馬路，東行線封閉，於是港島交通大亂，東行車輛由灣仔頭塞至西隧出口。運輸署發緊急通告，叫駕車人士改用西隧或東隧，實在唔多通。由九龍過海去中環，行東隧算ＯＫ，但行西隧就未必掂，要睇時候。西隧係夠晒快，但早上返工時間，八點到十點左右，一出西隧不久就會在信德中心一帶塞住，車行極慢。星期一早上繁忙時間，碰到告士打道爆水管，行西隧往中環就一定死火啦，運輸署叫人行西隧做乜？靠害乎！應該叫人盡量坐地鐵，在九龍就要棄巴士坐地鐵啦。七點零已經知道爆水管，告士打道東行線封閉，運輸署竟然冇盡量勸阻巴士公司與的士從西隧過海東行，失策到極。
港大大教授Ｌ自南區坐的士去中環中心，的士去到信德附近停咗十五分鐘唔郁得，唯有落車急步走路往中環中心，行到身水身汗，準時九點前到達約會地方，滿頭大汗兼氣喘，旁人又驚佢在冷氣間攝親着凉，佢坐定定之後，收音機播交通簡訊，播出運輸署呼籲駕駛人士改用東隧與西隧，不禁苦笑，佢如非係一位有修養嘅學者，可能已破口大罵！
左丁山之交通常識係在上午及下午繁忙時間唔好經西隧往中環向東行，要盡量在九龍坐地鐵。唔使聽交通報告嘅，西隧雖好，奈何港島出口唔掂，此乃先天缺陷也。
我哋小市民經常唔明白啲專業專家為乜度啲死橋畀我哋嘅，交通設計不以人為本，不予人方便。例如新開嘅西鐵南線以紅磡為終站，搞到東鐵新界乘客媽媽聲，以往可以直到尖東，在尖沙嘴返工都唔知幾爽，現在要遷就西鐵乘客少，因而列車少，大量乘客要在紅磡落車等轉車，建築邦就朝朝等到。但在九龍塘轉車雖然快，卻是人逼人逼死人。建築邦在灣仔返工，佢話要重新考慮回復舊方法，在紅磡落車，走往隧道搭過海巴士，與佢同樣想法嘅乘客相信有不少，巴士公司不妨諗諗增加紅隧巴士過海搶東鐵客。