一大班西裝骨骨嘅大隻佬，戴住拳套同頭套，30幾度大熱天時喺中環鬧市互揪，唔通有好戲睇？原來係一班芬佬為下個月舉行嘅白領慈善拳擊賽HedgeFundFightNite做宣傳。佢哋個個都係外資行身居要職嘅基金經理或銀行家，唔好以為佢哋玩玩吓，原來已經進行咗三個月地獄式特訓，由原先報名嘅44人淘汰到家得番20人，到十月底正式比賽當晚，就會剩番12位「隻揪隻」。
FightNite已經辦到第三屆，呢場龍爭虎鬥會喺跑馬地馬場上演，門券收入扣除開支後會捐畀微笑行動、替內地患上兔唇兒童做矯形手術。如果想見識吓芬佬「隻揪」兼做善事就唔好錯過呢個活動嘞！梁鑑章攝