09年夏天嘅球員轉會市場喺前晚關閉，20間英超球會加埋使咗成4.6億鎊（約58億港紙），單係曼城一隊就佔咗四分之一。雖則英超球會比舊年使多咗成4,500萬鎊，但就唔學似過去3年咁重金向其他聯賽招兵（06年有舒夫真高由AC米蘭以3,000萬鎊投車路士，07年有費蘭度托利斯由馬體會以2,100萬鎊過利物浦，08年則有羅賓奴由皇馬以3,200萬鎊過檔曼城）。無他嘅，07年大豪客曼聯同埋06年大豪客車路士，今夏齊齊閂水喉，最貴都係1,600萬鎊嘅路爾斯華倫西亞同埋1,800萬鎊嘅施哥夫，而且都唔算好出名。曼聯車仔唔願使錢，相反有油佬撐腰嘅曼城就繼續大放銀彈，繼舊年之後今年再做主角，用咗成1.18億鎊（約15億港紙）簽新球員，比舊年嘅7,770萬鎊，使多咗成4,030萬鎊。曼城開「咧」3戰全勝，其中身價2,500萬鎊嘅艾迪巴約仲場場入波，照咁睇，佢哋呢1億鎊真係使得抵。