台灣八八水災將近一個月，災區救援行動已告一段落，係時候進行重建工作。傳媒報道水災消息之餘，都盡一分力籌集善款，壹傳媒集團噚日捐咗1,180萬新台幣（折合港幣約278萬元）善款畀台灣紅十字會總會，協助災民重建家園。當地紅十字會總會秘書長陳士魁話，感謝壹傳媒集團同社會各界嘅愛心捐款，未來一定唔會辜負每一顆愛心，全力協助災民重建家園。
對於陳士魁嘅感言，壹傳媒集團唔敢居功，認為善心出於廣大讀者。台灣《蘋果日報》社長杜念中話，如果《蘋果》捐款可以算係一個善行，絕對係台灣《蘋果》讀者對災民嘅心意；台灣《壹週刊》社長裴偉就話，今期刊物宣佈咗義賣後，銷售速度比平常快10個百分點，反映台灣《壹週刊》讀者對協助水災災民嘅迴響熱烈。