俗語話齋「人搖福薄、樹搖葉落」，咁如果「車搖」（車震）又點呢？人稱「孫行者」嘅中國國籃後衞孫悅可能會答你：「咁咪得米囉！」
23歲嘅孫悅今夏慘事多，先傳出俾拍拖5年嘅模特女友古晨「飛」咗，正當感情受創之際，喺7月又俾湖人裁走，搞到下季仲未有班落；之後披上國家隊戰衣喺亞錦賽決賽慘負伊朗，可謂衰到谷底。不過孫悅依然嘻皮笑臉；日前呢位「3失青年」被影到同一名浙江富豪千金食飯，之後仲玩埋「車震」！蜜運「療傷」，唔怪得笑得出啦！
話說孫悅當晚先同呢位富家女，喺北京高級飯店金鼎軒撐枱腳，仲細聲講大聲笑，兩人食完晚飯離開去攞車時已好癡纏。孫悅更揸住架過百萬嘅Benz，同「富家女」去天壇附近，嘗試搵吓日租200元人民幣嘅平價酒店落腳，可惜統統爆滿，搞到好冇癮。
孫悅「車震」逐格睇
昏暗樹林車中纏綿
籃球場上一向唔服輸嘅孫悅，即踩行油將架車駛到男籃宿舍南邊、燈光昏暗嘅樹林之中。車一停定，鏡頭下只見兩人慢慢爬去車嘅後座，開始纏綿遊戲啦！半個鐘頭後，見到兩人已坐回前座，「富家女」輕撥秀髮，孫悅就邊唞氣邊掛上甜蜜笑容。之後孫悅載「富家女」去停車場，由得佢自行駕寶馬Z4離開，並冇送伊人返屋企。其實孫悅今年先23歲，同女友癡纏絕對冇乜大不了，不過國家隊跌落谷底，自己又未有班落，係咪要畀心機打好啲波先呢？