香港呢期潮興爆大鑊。先有飛哥爆下屆特首大熱梁振英係共產黨黨員，嚇到梁振英否認都嚟唔切；家連香江第一健筆、《信報》創辦人林行止都追上潮流，踢爆股民捧為股海明燈嘅曹仁超專欄〈投資者日記〉，原來係共同創作，世上唔止一個曹仁超。
曹Sir上《飯局》亂噏
逼到林行止揭開呢個多年秘密，原來又係因為曹Sir講錯嘢。曹Sir早排上《志雲飯局》，分享多年來喺股海浮沉嘅心路歷程，仲提到自己同林行止一齊創辦《信報》嘅威水史，同埋林行止女兒林在山冇興趣接手《信報》云云。
點知林行止噚日喺《信報》專欄罕有咁高調反駁，話《信報》係佢同太太駱友梅創辦，當年背後有報壇前輩羅治平、股壇前輩香植球大力支持，而曹Sir嗰陣仲喺石林投資公司打工，只係公餘時間供稿《信報》，初頭係用筆名「思聰」寫專欄〈香港股市〉，後來先加碼寫埋〈投資者日記〉，就連「曹仁超」呢個筆名，都係林行止度出嚟。
爆「木宰羊」非原創
林行止仲大爆原來〈投資者日記〉關於財經金融嘅消息，先係出自曹Sir手筆，其他政壇內幕消息，則「百分之九十九點九九與他無關」；就連個個以為係曹Sir口頭禪嘅「木宰羊」，都係林行止取自台灣作家柏楊著作，台灣話即係「不知道」咁解。
林行止又澄清，佢女兒林在山唔係冇興趣接手《信報》，只係獨力支撐咗幾年後，因為要生兒育女，所以先退下來，由佢兩老重出江湖。林行止話雖然識咗曹Sir40年，但一、兩年都未必見到一次，而且曹Sir專長係投資常識，對於《信報》經營事務則所知無多，語氣都幾重吓。
曹Sir呢輪認真開口夾着脷，前排以普通話接受內地傳媒訪問，將「經濟」變「精子」，成為全城笑話。今次仲激到老拍檔向佢開火，下次講嘢前真係要諗過。連好多支持《信報》多年嘅網民，都留言話噚日嘅〈林行止專欄〉係大揭秘，解開咗好多收埋多年嘅謎底。
八方打畀曹Sir問吓佢有冇睇林行止篇文，佢淡淡然答一句：「我對呢啲嘢，冇乜好回應。」咁就收線。
mailto:[email protected]