【一夜賭城戀大咗之今晚沒借口】一念天堂，一念地獄，為保天王形象講大話的劉德華，自上周六被本報獨家踢爆已婚後受盡抨擊，苦心經營28年的誠信及正氣形象，在短短5日內面臨嚴峻考驗。昨日華仔從北京返港，現場雖獲逾百fans護航定驚，但自知衰咗的華仔已無復自信自傲，表現無助又無奈，更眼泛淚光兩度公開謝罪，懇請大家原諒其不智行為。
向來信譽良好、形象正氣的劉德華，一直是大部份港人心目中的正面藝人代表，沒想到他為捍衞天王地位，竟然大話連篇掩飾與朱麗倩的已婚事實，又缺席外父的喪禮。
及至上周六本報揭發華仔賭城結婚鐵證後，他才在網上留言自揭謊言底牌，承認已婚及會人工授孕生兒育女，奈何這番遲來的告白已影響形象，令其民望下降，不少fans也對華仔講大話深表失望。
百感交集激動眼濕
身為太平紳士的華仔為挽民心，已放下身段將私人底線豁出去，向fans解釋講大話的苦衷。昨日華仔完成內地工作由北京返港，吸引半百傳媒採訪，又有逾百fans接機力撐偶像雪中送炭。下午約4時抵港的華仔一面疲累地現身，他甫出閘現場即混亂一片，神色凝重的他見狀說：「大家不如出去先，我企定定喺度接受訪問。」
其後華仔以眼神鎮服fans守秩序，他接受訪問時雖已做好心理準備，但難掩百感交集，一時激動得眼濕濕，一時雙耳通紅，講朱麗倩又有口難言，提及舊愛喻可欣時則一派無奈。
記：記者 劉：劉德華
記：你係咪壓力好大？
劉（眼有淚光）：首先我係公眾人物，所以最近自己嘅行為，覺得講大話令好多人失望，所以公開同所有曾經相信我嘅人道歉，希望佢哋可以原諒我。我可以公開講，我結咗婚。
記：你有冇仔女？
劉（語氣肯定）：我冇小朋友，無論男女都冇。以前到家影到嘅係家人嘅親戚或者朋友嘅細路仔，佢哋仲細個，我覺得畀佢哋過平靜生活。
記：有個喺馬來西亞出現嘅細路女同你父母飲茶喎？
劉：唔係同一個人，飲茶嗰個係我家姐嘅孫女。
封大話天王唔開心
記：你好想有小朋友？
劉：我心裏面嘅事情唔方便講。
記：係咪接受人工授孕？
劉：呢個係我自己嘅事，我想擺喺心裏面，唔想講出嚟。
記：如果授孕成功會否公開分享？
劉：唔想同大家講咁多關於呢啲事，到時先算。
記：譚詠麟話向你提供生仔秘方？
劉：多謝，多謝，多謝。
記：講出嚟之後係咪鬆一口氣？
劉：當然啦，一路放喺心裏面，一個秘密咁耐，自己家可以……唔……點講呢……我唔識點講。
記：最鬆一口氣嘅係咪你太太？
劉：唔好談論咁多。
記：太太係咪好大壓力所以唔出街？
劉：當然會啦，希望佢好。
記：你最擔心嘅係咪太太？
劉：所有人都擔心，最擔心係屋企人同佢。
記：以前你為咗保護家人而唔講私事？
劉：唔想大家揣測啲乜，喺網絡同報紙都講咗，唔想再講。我做錯事係應該（有壓力），其他人唔應該。
記：你被封大話天王係咪好唔開心？
劉（語氣失望）：唔開心o架，嚟緊日子會做好啲。
聞千嬅黎明即合十
記：會唔會同太太出席fans聚會？
劉：冇諗過。
記：喻可欣話因為你而唔結婚，你覺得佢係咪想出風頭？
劉：唔好再講其他人。我衷心對相信我嘅人講對唔住。
記者再問華仔是否知道黎明和楊千嬅已婚時，他只雙手合十未有回答。華仔由出閘至受訪後再上車離開，整個過程為時約20分鐘，接着他便直返寓所慰妻。
採訪、攝影：馬建華、陳順禎、
張俊銘、黃文偉
特稿：朱麗倩母愛爆棚？
劉德華昨日回港時，雖然在機場為過去不認結婚一事道歉，但仍強調自己沒有小孩子。其實多年來坊間一直有傳華仔已有子女。
上月在朱麗倩亡父的喪禮上，出現了一個與她十分相似的小女孩（圖），而該女孩又與其後跟劉父劉母晚膳的女孩十分相像。早於98年開始，外間已傳出華仔有一個在加拿大出生的女兒，算起來今年應已10歲或11歲，自此傳聞傳出後，傳媒的確不時在華仔的加多利山寓所外，見到其妻朱麗倩拖着一個小女孩出門看電影、睇演唱會和逛街，如果這個小女孩只是華仔親人的子女，朱麗倩竟視如己出般照顧，還帶到大馬出席亡父喪禮，她也未免母愛太爆棚了。
兩度回港態度大變
一個葬禮，意外揭發一段24年的地下情，華仔最近兩次返港都惹來大批傳媒追訪，其態度卻大相逕庭。上月25日華仔因缺席外父喪禮備受抨擊，為挽救聲譽與朱麗倩在機場上演世紀十指緊扣，雖然戴着口罩，但仍可看到華仔神情帶點不悅，對步步進逼的傳媒存有敵意，其間有人不慎撞到周梁淑怡，華仔即衝口而出向記者說：「你哋太離譜啦！你哋特登嘅。」猶如將滿腔怒火一下子發洩出來（圖）。
昨日他由北京返港，一臉倦容神采盡失，見慣大場面的他面對記者提問更罕有地支吾以對，言語間似百般無奈，但至少仍記得在鏡頭前微笑。不過被問及有關朱麗倩及子女的問題時，華仔忽然雙耳通紅，說到激動處更眼泛淚光，相信謊言接二連三被揭，華仔難免感到罪咎，愧對多年支持的fans，但埋藏多年的秘密終於見光，反而有如釋重負之感，才會有這張哭笑難分的表情。
衣裳捉：華嫂Tod's豆豆鞋夠潮
劉德華和朱麗倩上周在香港機場世紀拖手，齊以白衫襯牛仔褲的夫妻look亮相，年逾40的朱麗倩，身形不復年輕時苗條，簡單的白衣牛仔褲都可見其樸實低調，但她腳上所穿的，卻是意大利名牌Tod's最「響朵」的豆豆loafer，這雙豆豆鞋70年代已面世，是中產一族休閒時的最佳「腳下」選擇，最大特色是鞋底的bubble（豆豆）會隨年月被磨擦磨蝕，穿舊了便不能再穿，需買一雙新鞋取代，所以這款豆豆鞋數十年來都銷情穩定。
小八卦：Fans築人鏈護偶像
雖然劉德華今次被踢爆婚訊令部份歌迷大呼失望，但華仔一向甚懂冧fans之道，所以昨日返港仍獲過百死忠fans接機，由於現場有半百傳媒追訪，其fans即自發性築起人鏈貼身為偶像護航（左圖），其間更不斷有人送上禮物及利是以示支持，更舉起「我們永遠支持您」等牌仔，就連華仔走人時也高聲呼叫力挺偶像。
而華仔返回加多利山寓所時，為免傳媒硬闖入內，他即派出5名黑衣保安在住所大閘前把關（右圖），保安森嚴。
潘宏彬退出三人行
傳劉德華早年在好友潘宏彬介紹下認識朱麗倩，華仔和潘宏彬識於微時，同是82年無綫藝員訓練班同學，經常出雙入對，故曾被傳有斷背情，不過華仔斷然否認，又表示自98年後二人已沒再聯絡。
照顧好友生活
當年青靚白淨的潘宏彬，如今已是47歲的禿頭凸腩中年漢，退隱娛樂圈後他已結婚，目前職業是地產經紀。據知情者透露，潘宏彬當年名氣一直不及華仔，工作運也欠佳，但卻無阻二人交情，華仔在金錢上也一直支持好友到底，任食任住，對潘的生活也頗為照顧，後期華仔拍戲也有預好友一份，不過始終長貧難顧。
華仔早年公開與喻可欣拍拖後，有一段日子是三人行，華仔不時安排飯局介紹女孩子給潘宏彬認識，據當年出席過飯局的知情人士稱，飯局中華仔帶同喻可欣和潘宏彬同來，不過席間喻、潘二人沒有交流，甚至未曾交談，潘宏彬坐下只顧食飯，沒有太多說話，飯局後三人又一同離去。
撰文：林妃
