上季尾捲入假波醜聞嘅屯門普高，今季被足總董事局禁止佢哋續用屯門普高個名參賽，但呢隊由「金句王」任煒雄擔大旗嘅奇兵，就堅持唔接受今季改用石硤尾呢個名踢甲組。任總喺球隊友賽時向傳媒講，唔知足總用乜嘢理由唔准佢哋用屯門普高踢甲組，更加唔會接受用石硤尾參賽，一定會據理力爭，仲唔排除透過法律爭取㖭。
僅留用兩國援
講番上季俾張天德踢爆懷疑有國援打假波嘅奇兵，今季組500萬班費大軍，實行搞大佢；而球隊無論管理層同人腳都有好大變動，只留用趙偉同周展宏兩個舊國援，其餘姚曉聰同王丹等國援就冇得留低，新援暫時只有卓卓細佬史堤芬。