商台創辦人何佐芝趁商台50周年，以「何佐芝馮月燕慈善基金」名義，捐咗4,000萬元畀本港八大高等院校，每間約500萬。從何生嘅故事，八方領略到兩個道理：第一係「吃得苦中苦、方為人上人」，因為何生當年留學三藩市正值戰亂，冇錢讀書，佢監護人兼表哥叫佢喺佢間食物廠做嘢，每日擔擔抬抬。有晚，何生一連食咗五碗白飯，結果被表哥反問點解食咁多飯。何生當時冇出聲，練就「忍得、捱得」座右銘。今時今日佢好珍惜員工，商台開台首年就有盈利，佢先分紅畀員工，第二年先畀股東。
第二個道理係「寒天飲雪水、點滴在心頭」，皆因何生幾十年前寄人籬下嘅往事，包括試過一日托700包米、一次食咗幾多碗飯，何老先生仲記得好清楚。