【一夜賭城戀大咗之真愛開玩笑】楊千嬅日前被本報獨家揭發成為丁太後，昨日她和丁子高分別現身工作，一對新人皆難掩新婚喜悅，其中丁子高自爆稱呼老婆做BB，當把老公一番說話轉述給千嬅聽時，她即百無禁忌說：「咁得人驚！死呀。」
剛剛成為丁太的楊千嬅近日馬不停蹄工作，昨日穿上套裝到將軍澳電視廣播城，錄影《慎用救護愛心SHOW》，記者笑言千嬅成為丁太後即轉形象以太太look示人，她聞言笑說：「係呀。」不過千嬅坦言被稱呼為丁太不太習慣，令自己不自在有點「身痕」，但她轉頭又表示這個稱呼很開心和有新意。
「佢非常可愛」
丁子高昨日在另一活動現身，問千嬅會否和老公一齊出來與傳媒見面，她說：「等正式結婚先，我哋分開工作，大家有唔同崗位，唔會專登一齊出現，你估做騷咩。」但提到以夫妻檔工作或拍廣告，千嬅表現不太抗拒，還問大家有何提議。提到同被揭已婚的劉德華昨日回港時因講大話而道歉，千嬅表示沒有意見，但祝福他有完美開心生活，及盡快生BB。千嬅又笑言因自己被揭結婚，連帶接着老闆黎明被揭已婚，她笑說：「係累咗黎生，所以我都唔敢打畀佢，但諗吓又唔關我事。」
丁子高昨日一身返工look，為所屬公關公司在中環的Furla活動打點，但他手上無戴婚戒，其公司又澄清丁子高月薪多於報道的兩萬元。丁子高面對記者十分拘謹，但他指新婚好開心，問到對千嬅有何愛的承諾？他說：「照顧佢一生一世，會keep住每日開心，感情唔會轉淡。」問他愛千嬅甚麼？丁子高忍不住說：「佢係非常可愛嘅女仔，有時望住佢嘅小動作，專心做事時個樣好好笑，好可愛，我係叫佢做BB，咁樣叫最好。」他謂每晚會和千嬅傾電話，盡量一同食飯，他又表示暫時未能二人世界，但若要置業必定自己一手搞掂，他又透露將自組公司做老闆，不需老婆打本，更會承包自家婚禮，但暫時沒有給家用老婆。
強調財政獨立
至於何時生BB，丁子高直言暫時未有計劃，但他已戒煙作好準備，他又表示最好生一子一女。至於有報道指他分千嬅身家，他強調：「佢分我好啲，我會買份保險畀佢，將來乜都畀晒佢。」他又強調兩人財政完全獨立。
當記者再轉述丁子高自爆稱呼千嬅做BB，她聞言甜絲絲說：「佢見到得意可愛嘅嘢，好似狗仔咁都會叫BB，佢話乜就乜。」接着千嬅得知老公爆出不少兩人甜蜜事，她即作狀大發嬌嗲說：「佢講咁多，咁得人驚，死呀。」兩人隔空打情罵俏實行甜到漏。
採訪：卓寶花、梁錦雯
攝影：仇志德、林德雄