美國已故黑人民權領袖馬丁路德金名句：「Ihaveadream！」（我有一個夢）成為全球金句，熱刺領隊哈利列納六十有二，不過仍然發緊英超冠軍夢，臨近轉會市場關閉前不停掃貨，睇吓呢次哈利列納可唔可以笑到最後。
簽卡蘭積卡頂莫迪歷
哈利列納83年已經做領隊，大大話話教咗26年波，除咗幫樸茅贏過08年英足盃外，就再冇贏過其他主要錦標，咁又難怪列納，佢教過嘅韋斯咸、修咸頓、樸茅都只係中型班，護到級已有交代，仲學人「談冠」？不過今季開始整季執教熱刺，說話又唔係咁講嘞，話晒開季4連勝，同車路士平起平坐，而且又冇歐洲賽包袱，唔全力爭英超勢係假。
話就話列納狂掃貨，不過佢絕對唔係「老懵董」，識得睇住條數；用250萬鎊就從樸茅簽入克羅地亞國腳卡蘭積卡，頂因傷缺陣至少6周嘅莫迪歷，抵到爛；列納份人認真念舊，之前已經從教過嘅樸茅挖走迪科爾同高治，今次簽埋卡蘭積卡，而且熱刺陣中已經有莫迪歷同哥魯卡兩件克國兵，卡蘭積卡融入球隊不成問題。
樸茅遭拆骨勢危
列納又睇中另一位樸茅兵，就係39歲門將占士，但新特蘭就同列納爭緊，交易未落實。另外，列納又希望將賓尼做籌碼，同曼城交換馬田柏杜夫，但臨門一腳曼城唔想要賓尼，交易有阻滯；家熱刺冠軍賠率仲有25倍（見附表），暫列第6熱門，信列納夢想成真，買番啲都唔過份！
相反樸茅繼續俾人拆骨，之前已有格連莊臣、高治、蘇甘保同迪斯甸走人，家連卡蘭積卡都走埋，就算啱啱簽入曼城中堅賓希姆，同借到賓菲加中場耶巴達，實力仍然唔掂，唔通同曼城同一「老闆」嘅阿布扎比集團想樸茅降班，可以有機會贏英超同英冠冠軍？
英超冠軍賠率
車路士：1.95倍
曼聯：3.5倍
阿仙奴：6.5倍
利物浦：7.5倍
曼城：15倍
熱刺：25倍
註：只列前6熱門
資料來源：足智彩 截至：01/09