為一對釣魚靴尖叫
談完男裝，少不了女裝登場。Winifred（黎堅惠）由入門口影相至訪問完結，一直開口不離那對「去到腳盡頭」的釣魚靴，評價是未來十年Prada都唔會再出現類似設計。望着她嘴角不自覺的向上彎，完全感受她對今季Prada女裝的鍾愛程度。女人看着自己真心鍾意的東西，是遮掩不到的。
記=記者
W=Winifred（黎堅惠）
記︰可否講講對Prada09FW的印象？
W︰「當我見到全個Collection，第一樣會尖叫嘅一定係對靴，今日可能已經講咗第三次。就係對釣魚靴，因為我同其他時裝人一樣，一到秋冬就買靴，雖然可能你已經有十對八對唔同長度嘅長靴，但係從來無買過一對去到腳嘅盡頭，所以我好興奮！同埋有個經驗係佢並非用拉鏈，而係用皮帶穩住，所以呢個係一個好好嘅Design。至於其他嘅短靴，位於小腿嘅扣都係來自古代男裝嘅襪扣，今季有幾個我鍾意嘅Brand而Prada就係其中一個，將男裝嘅Details好聰明咁放入女裝，你會覺得好有型，但你唔會覺得好男人。」
復興八十年代的閃
記︰除了你十分喜愛的釣魚靴外，還有其他突出的設計元素嗎？
W︰「Prada亦同時覆蓋今季好Hit嘅潮流，例如淑女式嘅窩釘。過去嘅兩季都好Hit攻擊性強嘅窩釘，但Prada今季就做咗斯文而細粒嘅窩釘，好有矜貴嘅感覺。另外一個Trend就係原紅色Geranium，將紅色演繹出唔同嘅深淺，喺手袋上同埋喺幾條裙上面，都演繹咗原來紅色可以有咁多嘅可能性。」
記︰窩釘是今季很多品牌的主打，除此之外還有其他流行元素嗎？
W︰「至於其他Trend，好明顯係所有閃令令嘅嘢，無論你叫佢RockGlamour、RockChic或者係DiscoFever，咩名堂都唔緊要，總之所有閃嘅嘢都會返晒嚟。例如行街見到啲StreetWear舖頭，都會有晒啲緊身裙，好似八十年代睇港產片見到嗰啲好多好Cheap嘅物料，又貼身又反光。但係你會見到Prada會用昂貴嘅方法去做，例如釘閃片，連一個好四正嘅公事包都會釘晒珠片。我會覺得大家諗到嘅既然都咁悶，經濟又差，大家嘅想像力會想返去PartyMood，咁PartyMood最強就係八十年代。」
就是愛她的長青
記︰傳說中，Prada是一個後生仔女出糧時的必買名牌頭三甲，看過今季後，你覺得這個傳說會否延續？
W︰「我自己有好多讀者都係PradaFans，其中我好肯定Prada袋係好得民心。我諗因為佢有個好經典嘅設計，唔會因為今季買咗，令你六個月之後拎番出嚟會好尷尬，因為Prada唔會特登搞限量特別版呢類名堂，令人一窩蜂去買完之後就以後都唔用得。所以買Prada嘅人會欣賞品牌長青嘅氣質，例如尼龍料所造嘅設計，二十年後都不斷出新色新設計，可能你幾年前買咗個化妝袋，你唔會覺得拎唔到出嚟見人，所以係呢一點令到後生女咁樂意出糧去進貢。我估啦！哈哈！」
記︰不如提議讀者今季Prada女裝應該入手的Items。
W︰「我覺得今季Prada必入係佢嘅棗紅色，即係棗紅色嘅Anything。話就話今季主打係Geranium，但都見到有玫瑰紅嘅傾向，亦有棗紅色，Even我自己嘅手袋。我覺得呢隻色唔係季季都有，所以無論尼龍袋、銀包、手袋、鎖匙包、冷背心或者冷襪，即係細細件嘅Accessories，未必可以下年買得番呢隻色。同埋仲有Saffiano系列，今季都出咗一啲好靚嘅顏色，我會好推薦畀大家，其中有個珊瑚橙色及玫瑰紅，都係紅色嘅變調，我覺得呢幾隻色係2009秋冬嘅特色。」
Prada09FWReady-to-wear
Prada（25222989）
中環歷山大廈G4舖