熱刺喺今季英超聯表現突出，連帶佢哋嘅球員亦再次獲得英格蘭國家隊重視，好似前鋒迪科爾同埋翼鋒艾朗連儂咁，都入選英格蘭，備戰周六對斯洛文尼亞嘅友賽，同埋下周三鬥克羅地亞嘅世盃外大戰。不過，最令我求大俠頭嘅，係今季喺熱刺只係後備嘅前鋒高治，竟然都入選，反而曼聯前鋒奧雲則繼續名落孫山，唔通熱刺效應真係咁勁？
並唔係我求大俠憎人富貴，不過，熱刺呢個勁勢，未必可以維持好耐，因為佢哋嘅克羅地亞中場莫迪歷上場聯賽勇戰斷腳，最新話要休息起碼6星期，肯定唔可以代表克羅地亞鬥英格蘭之餘，連埋等佢好番操起狀態，熱刺睇怕都要成兩個幾月唔用得佢。有見及此，熱刺領隊哈利列納就趁轉會窗未關閉前搵中場，除咗想向前球會樸茨茅夫撬走卡蘭積卡外，仲打皇馬嘅雲達華治主意㖭！