祖國電訊業重組後，下一個格鬥場係智能手機！上周五，聯通（762）宣佈已經搞掂咗蘋果（係美國蘋果），同志們第四季就有「艾風」（iPhone）行貨用。咁行業龍頭中移動（941）梗係跟到貼，噚日就唔聲唔聲喺北京開記者會，宣佈推出佢哋自主開發嘅TD-SCDMA制式Ophone的作業系統平台，仲首次公開幾部由聯想、LG、Dell等開發嘅Ophone手機真身畀大家睇！
因大會主持宙仔王建宙冇講到幾時有得賣，所以遠在香港嘅華華即刻搵北京班老友，落門市收收風！據聞有店員反問咩係Ophone、有店員話門市至少要喺記者會後一個星期先會收到資料、又有店員即刻上網睇先知有呢單新聞。咁大單嘢開記招，門市都唔知，呢個情形肯定唔會喺香港發生。
中移推Ophone撼iPhone
Bytheway，Ophone成件事唔會令華華感到意外，唯一有趣嘅地方係：第一，作為港人愛股，中移動有乜嘢可以牽動股價嘅大新聞，好似永遠唔想畀香港傳媒知咁（上次講入股遠傳都係鬼鬼祟祟）；第二，國家支持佢哋自主開發TD-SCDMA手機，出到嚟嘅Ophone，就算唔係喪抄，都激似「艾風」，睇怕除咗「愛國」，都應該無乜理由要揀Ophone囉！
李華華
mailto:[email protected]