豪宅有價，發展商紛紛趕喺年尾前大舉出貨，恒隆地產（101）及港鐵（066）「平售」君臨天下急速回籠過百億；新鴻基地產（016）天璽解封餘貨，勁加價兩成硬撼；新世界發展（017）跟住加價推售名鑄低至中層單位，即使有名人炒家撐場都谷唔起個勢，仲有唔少買家臨場縮沙，令人懷疑本港豪宅市場係咪開始出現「拐點」？
雖然一個盤反應差過預期就話豪宅見頂，未免以偏概全，可能只反映西九確係食正地運，特別受內地客歡迎，但畢竟外面風雨飄搖，資金市最好睇清FundFlow。西九豪宅由舊年底至今升近50%，聽富貴住客講，豪華會所早已「去香港化」，出入都係大大聲「刨冬瓜」，令「原居民」朋友大呻冇癮。
不過資金大舉湧入似有放緩迹象，上月金管局日日接錢的新聞已銷聲匿迹，連星展的報告都提到，資金只等一個藉口流出，並非大家一廂情願對香港咁長情。中港資產貴，大孖沙邢李㷧都轉戰寶島買南山人壽，英國樓市亦開始升溫。
小心資金流出中港資產
倫敦豪宅上月賣出250間價值逾百萬英鎊的住宅，同比急升234%。自雷曼事件後，當地豪宅樓價連跌5個月，跌足15%先止跌，上半年升番5%，但比起中、港期間的大升就差得遠。
100萬英鎊折合港紙都只係千零萬，喺香港買唔到啲乜，但手持人仔的內地客，見當地樓價同滙價跌咗咁多，近期都轉趨積極。去過英國留學嘅都知，呢啲歷史悠久的大宅通常陰風陣陣，但中投公司顯然唔太怕黑，經歷黑石同大摩嘅坐艇教訓後，首次涉足海外房地產市場，就拍住卡塔爾主權基金等投資金絲雀碼頭。唔止咁，中投仲諗住添食，將今年投資總額增加10倍。睇嚟市場正重新留意歐美嘅投資機會，大型基金亦正重新評估風險同調整投資組合。
自中央收緊房貸，7月以來出現價升量跌，有實力者擔心樓價高位有調整，資金自然會轉投海外。專營豪宅的KnightFrank早前統計，英國超過六成銷售來自海外，特別係中國、印度同俄羅斯買家。
資金無情，邊度有水位就流去邊，美國豪宅隨英樓市回穩整固再現炒風可能短期會出現，到時資金班師回朝亦唔需要搵理由，投資者炒時炒，要控制注碼，步步為營。
胡孟青