睇董橋星期日專欄學習中文，係星期日之例行公事，八月二十三日董橋寫《卡普里之戀》，談及英譯中之精妙，引述湯新楣先生講宋淇：「……長年靠在軟椅上細細掂量譯稿裏的旮旮旯旯……」九字加日字，淺白得很，但合埋成為「旮旯」，咁就考起，唔識㖭，立即查《辭海》，搵唔到噃，唔通唔識查？不過身邊有iPhone，姑且試吓下載咗嘅中文字典，竟然有噃，音ga,la，舉例shangala相等於廣東話「山卡啦」嘅意思，英文意思係everyrookandcranny（rook：牆邊角落；cranny：縫隙），查完字典，明白宋淇就係每字每句每段都檢驗清楚，「窿窿罅罅」都逃不過他的法眼。
呢日與賓架W、賓架A吃午飯，賓架A竟然不顧膽固醇，一反吃得健康之流行風氣，叫一碟「阿黃炒飯」加兩隻窩蛋，連左丁山都叫一聲吃不消，因為「阿黃炒飯」就係洋葱牛肉喼汁炒飯，味道濃郁到極。笑佢：「你要做幾多分鐘運動先至可以消化呢碟飯？」賓架A話：「做得辛苦，吃無禁忌都得啩，占美嘅阿黃炒飯好好味道啫！」賓架做得辛苦，自不然係雷曼所累，九月十五日就係雷曼破產一周年，賓架W與賓架A皆有「不願回憶，不敢忘記」之感，賓架A話：「卒之會有一日證監會、金管局會要求銀行檢視客戶之小學、中學、大學畢業證書，先至可以分隔銷售投資產品！」
講雷曼，兩位賓架食無味，講旮旮旯旯，佢哋反而覺得有趣，令左丁山覺得不讀董橋，無以言。之後大家講到打官司搵英國著名大狀，係不惜工本之舉，為何請漏了師傅為顧問？要慳都唔旨在呢一筆狀費啦！賓架W飽讀歷史故事，問：「聽過千金之子，不死於市嘅故事未？」賓架A話唔知，左丁山話聽肥仔K幾次，識得係陶朱公救次子之故事，本想派三子去，但長子堅持出馬，以死要脅，陶朱公無奈從之，但已預知長子會累死次子。飯後賓架W傳來：《史記越王勾踐世家》一篇，果有心人也，此篇最尾幾段就係講陶朱公救仔嘅故事。