遠東發展（035）二公子兼CEO邱達昌，可能食慣山珍海錯，噚日竟然自稱「掃街王」，一見記者即時豪派酒店出品嘅「大排檔鴛鴦」。華華嗒過都覺幾有水準，但邱二少嫌唔夠喉，未幾又嗌雞翼、春卷、三文治，仲特別要求「蛋散」一客，話好耐未嘆過，熱鬧過開大食會！
講番最新業務狀況，邱二少話遠展未來12至18月，計劃推售逾千個單位，預期套現幾十億銀，當中上海同廣州兩個住宅盤最快半年內推出，而年初買落嘅澳洲地皮，會興建3000個住宅，分兩三期興建，料兩年後可推售。
至於遠展近年拓展嘅內地酒店業，佢話希望透過管理合約模式，兩三年內令有關房間數目倍增至4000間，主要集中喺成都、上海、武漢、中山同杭州5個地方，香港起緊嘅酒店房間目前就有2000間。